មីយ៉ាន់ម៉ា៖ យោធាមីយ៉ាន់ម៉ាបានធ្វើការវាយប្រហារតាមផ្លូវអាកាសកាលពីថ្ងៃអាទិត្យ ទី១០ ខែមេសា សំដៅលើក្រុមឧទ្ទាមជនជាតិភាគតិចក្នុងរដ្ឋការែន ខណៈដែលការប្រយុទ្ធថ្មីៗបានផ្ទុះឡើងដើម្បីដណ្តើមគ្រប់គ្រងទីក្រុង Lay Kay Kaw ក្បែរព្រំដែនថៃ។ នេះបើយោងតាមអ្នកនាំពាក្យក្រុមឧទ្ទាម និងរបាយការណ៍ប្រព័ន្ធផ្សព្វផ្សាយ។

ប្រជាពលរដ្ឋរាប់ពាន់នាក់នៅ Lay Kay Kaw ដែលមានចំងាយប្រហែល ២០គីឡូម៉ែត្រពីព្រំដែនថៃ បានភៀសខ្លួនរួចហើយ បន្ទាប់ពីការប្រយុទ្ធគ្នាកាលពីខែធ្នូ នៅជុំវិញទីក្រុងដែលជាជម្រកសម្រាប់អ្នកគាំទ្រលទ្ធិប្រជាធិបតេយ្យចាប់តាំងពីកងទ័ពបានដណ្តើមអំណាចកាលពីឆ្នាំមុន។

អ្នកនាំពាក្យនៃក្រុម Karen (KNU) ដែលជាក្រុមឧទ្ទាមជនជាតិភាគតិចចំណាស់ជាងគេបំផុតរបស់មីយ៉ាន់ម៉ា បាននិយាយថា កងទ័ពហាក់ដូចជាកំពុងពង្រឹងតំបន់បន្ទាប់ពីការប៉ះទង្គិចគ្នាកាលពីថ្ងៃអាទិត្យ ទោះបីជាគេមិនទាន់ទទួលបានរបាយការណ៍អំពីការប្រយុទ្ធថ្មីកាលពីថ្ងៃចន្ទក៏ដោយ។

អ្នកនាំពាក្យ KNU លោក Padoh Saw Taw Nee បាននិយាយថា៖ «ពួកគេមិនបានដកថយទាល់តែសោះ។ ពួកគេកំពុងបញ្ជូនទាហានបន្ថែមទៀត»។

លោកបន្ថែមថា កងកម្លាំងរបស់ក្រុមនេះបានសម្លាប់ទាហាន ៤៥នាក់ និងបានបាត់បង់យុទ្ធជនពីរនាក់របស់ពួកគេនៅក្នុងការប៉ះទង្គិចគ្នាកាលពីថ្ងៃអាទិត្យ។

ទូរទស្សន៍សំឡេងសាធារណៈ ដែលគាំទ្រដោយរដ្ឋាភិបាលស្រមោលដែលបានបង្កើតឡើងតាំងពីរដ្ឋប្រហារ បាននិយាយថា ពួកឧទ្ទាមបានឃុំខ្លួនមេទ័ពម្នាក់ពីកងទ័ពមីយ៉ាន់ម៉ាក្នុងអំឡុងពេលប្រយុទ្ធគ្នា។

ទីក្រុង Lay Kay Kaw បានស្ថិតនៅក្រោមការគ្រប់គ្រងរបស់ KNU ភាគច្រើនក្នុងប៉ុន្មានខែថ្មីៗនេះ ប៉ុន្តែកងទ័ពបានព្យាយាមអះអាងការគ្រប់គ្រងឡើងវិញ និងការប្រយុទ្ធគ្នាបានផ្ទុះឡើងកាលពីខែធ្នូឆ្នាំមុន ។

លោក Padoh Saw Taw Nee បាននិយាយថា ការប៉ះទង្គិចគ្នាកាលពីថ្ងៃអាទិត្យបានកើតឡើងបន្ទាប់ពី KNU បានព្យាយាមតដៃជាមួយពួកកងទ័ពកងទ័ពដែលបានចូលទៅក្នុងស្រុកមួយ។

ក្រុមឧទ្ទាម និងប្រព័ន្ធផ្សព្វផ្សាយក្នុងស្រុកបាននិយាយថា ជាការឆ្លើយតប យោធាមីយ៉ាន់ម៉ាបានធ្វើការវាយប្រហារតាមអាកាស។

គួររំលឹកដែរថា កាលពីខែធ្នូ KNU បានអំពាវនាវឲ្យសហគមន៍អន្តរជាតិបង្កើតតំបន់ហាមហោះហើរក្នុងតំបន់ដើម្បីការពារជនស៊ីវិល។

ប្រទេសមីយ៉ាន់ម៉ាបានធ្លាក់ចូលទៅក្នុងភាពចលាចលចាប់តាំងពីកងទ័ពបានផ្តល់រំលំរដ្ឋាភិបាលស៊ីវិលដែលដឹកនាំដោយលោកស្រី Aung San Suu Kyi កាលពីឆ្នាំមុន ដោយបានជំរុញឱ្យមានការបង្ក្រាបយ៉ាងបង្ហូរឈាមនៃការតវ៉ាដោយកងកម្លាំងសន្តិសុខ និងការបង្កើតកងជីវពលប្រឆាំងរបបយោធា៕